ՀՀ փաստաբանների պալատի նախագահի տեղակալներ Հարութ Ակլունցը և Հարություն Թունյանը, Հանրային պաշտպանի գրասենյակի ղեկավար Գևորգ Մկրտչյանն աշխատանքային այցով գտնվում են Էստոնիայում՝ ծանոթանալու անվճար իրավաբանական օգնության համակարգին, ինչպես նաև խթանելու միջհամայնքային գործընկերությունը:

Փաստաբանների պալատի պատվիրակության ուշադրության կենտրոնում է հատկապես էստոնական բազմամյա կուտակված փորձը թվային գործիքների և էլեկտրոնային համակարգերի կիրառության ոլորտում:

Այցի շրջանակներում, ի թիվս այլնի, քննարկվել են՝

• Էստոնիայի Փաստաբանների պալատի գործունեության ընդհանուր կառուցվածքն ու գործառույթները,

 • պետության կողմից ֆինանսավորվող անվճար իրավաբանական օգնության կազմակերպման համակարգը և այդ գործընթացում ներգրավված հիմնական ինստիտուտների դերակատարությունը,

• կիրառվող թվային գործիքները,

• անվճար իրավաբանական օգնության շրջանակում մատուցվող ծառայությունների հարկման կարգավորումները,

• մասնավոր փաստաբանների կողմից pro bono ծառայությունների խրախուսման ներկայումս կիրառվող մոտեցումները։

Այցի արդյունքներով պայմանավորվածություն է ձեռք բերվել ամրապնդել ձևավորված կապերը` հետագա արդյունավետ համագործակցության ծավալման համար, որոնք ի նպաստ կծառայեն նաև Հայաստանում անվճար իրավաբանական օգնության համակարգի և թվային գործիքների հետագա զարգացմանը։

Նշենք նաև, որ Փաստաբանների պալատի պատվիրակության աշխատանքային այցն իրականացվել է Եվրոպական միության ֆինանսական աջակցությամբ, ՄԱԶԾ-ի, ՅՈՒՆԻՍԵՖ-ի և ՄԱԲՀ-ի կողմից իրականացվող «Մարդու իրավունքների պաշտպանության խթանում և ազգային հաստատությունների հզորացում» ծրագրի շրջանակներում: