ՀՀ փաստաբանների պալատի հանրային պաշտպանի գրասենյակի ներկայացուցիչները «Անվճար իրավաբանական օգնություն կանանց» նախաձեռնության շրջանակներում այցելել են «Աբովյան» քրեակատարողական հիմնարկ։

Այցի ընթացքում հանրային պաշտպանները հանդիպել են քրեակատարողական հիմնարկում պահվող կանանց հետ և նրանց տրամադրել անվճար իրավաբանական խորհրդատվություն՝ ներկայացնելով տարբեր իրավական հարցերի վերաբերյալ պարզաբանումներ։ Քննարկվել են ինչպես քրեական գործերի ընթացքի, այնպես էլ քաղաքացիական և սոցիալական բնույթի խնդիրներ, որոնք հաճախ մտահոգում են ազատությունից զրկված անձանց։

Նմանատիպ այցերը կարևոր նշանակություն ունեն հատկապես այն անձանց համար, որոնք գտնվում են ազատությունից զրկված վիճակում և հաճախ ունեն իրավական խորհրդատվության հասանելիության սահմանափակումներ։ Նախաձեռնության նպատակն է նպաստել կանանց իրավական իրազեկվածության բարձրացմանը, ապահովել իրավաբանական օգնության մատչելիությունը և աջակցել նրանց իրավունքների արդյունավետ պաշտպանությանը: