2026 թվականի ապրիլի 25-ին և 26-ին տեղի է ունեցել փաստաբանական գրասենյակների ցուցահանդես:

Միջոցառման սկզբում հնչել է Հայաստանի Հանրապետության օրհներգը:

Ողջույնի խոսքով հանդես են եկել ՀՀ փաստաբանների պալատի նախագահ Սիմոն Բաբայանը և Փաստաբանական ակադեմիայի ռեկտոր Արա Զոհրաբյան:

Այնուհետև մեկնարկել է ցուցահանդեսի բացման արարողությունը: ՀՀ փաստաբանների պալատի նախագահ Սիմոն Բաբայանը կտրել է կարմիր ժապավենը՝ պաշտոնապես ազդարարելով փաստաբանական գրասենյակների ցուցահանդեսի մեկնարկը:

ՀՀ փաստաբանների պալատի նախագահն ու Փաստաբանական ակադեմիայի ռեկտորը շրջել են ցուցասրահում, այցելել բոլոր գրասենյակների տաղավարներ, զրուցել գործընկերների հետ:

Միջոցառման շրջանակներում իրականացվել է համաժողով «Ապագայի փաստաբանությունը․ զարգացման տեսլականը և մարտահրավերները» թեմայով, որի ընթացքում բանախոսությամբ հանդես են եկել ՀՀ փաստաբանների պալատի նախագահ Սիմոն Բաբայանը, ՀՀ փաստաբանական ակադեմիայի ռեկտոր Արա Զոհրաբյանը,  Հանրային պաշտպանի գրասենյակի ղեկավար Գևորգ Մկրտչյանը, ՀՀ փաստաբանական ակադեմիայի պրոռեկտոր Ռոման Ահարոնյանը, Եվրոպայի փաստաբանների և իրավաբանական միությունների խորհրդի (CCBE) փոխնախագահ Ալեքս Տալլոնը, Վրաստանի փաստաբանների միության նախագահ Իրակլի Կանդաշվիլին, Ֆրանսիայի Օ դը Սենի փաստաբանների միության նախագահ Մարի Պասկալ Պիոն, Վալանս քաղաքի փաստաբանների միության նախագահ Ֆիլիպ Տատիգյանը, Ֆրանսիայի փաստաբանների միությունների ազգային խորհրդի միջազգային համաժողովի նախագահ Մարի Էյմե Պեյրոն, Փարիզի փաստաբանների միության խորհրդի անդամ Մարիոն Կուֆֆինալը, Մոնպելիեի փաստաբանների միության նախկին նախագահ Լյուք Քիրքյաչարյանը և Փարիզի փաստաբանների միության նախկին նախագահ Բերնար Վաթիեն:

Համաժողովի շրջանակներում համագործակցության հուշագիր է ստորագրվել ՀՀ փաստաբանների պալատի և Վրաստանի փաստաբանների միության միջև, ինչպես նաև ՀՀ փաստաբանների պալատի և Ֆրանսիայի Վալանս քաղաքի փաստաբանների միության միջև:   

Ցուցահանդեսի երկրորդ օրն անվճար իրավաբանական խորհրդատվություններին, տաղավարների ցուցադրությանը զուգահեռ նախատեսված էր նաև աշխատաժողովներ և մասնագիտական քննարկումներ Հայաստանի փաստաբանների մասնակցությամբ:  

Ցուցահանդեսի նպատակն էր նպաստել հանրային իրավագիտակցության բարձրացմանը և իրավական մշակույթի ձևավորմանը Հայաստանում, ինչպես նաև գործընկերային շփումների ամրապնդմանը և նոր նպատակների զարգացմանը: Երկօրյա միջոցառման ընթացքում բազմաթիվ այցելուներ գրասենյակների փաստաբանների կողմից ստացել են անվճար իրավաբանական խորհրդատվություն:

Միջոցառումն իրականացվել է Եվրոպական միության կողմից ֆինանսավորվող «Մարդու իրավունքների  պաշտպանության խթանում և ազգային հաստատությունների հզորացում» ծրագրի շրջանակներում, որն իրականացվում է ՄԱԶԾ-ի, ՅՈՒՆԻՍԵՖ-ի և ՄԱԲՀ-ի կողմից: