ՀՀ փաստաբանների պալատի նախագահ Սիմոն Բաբայանը և Ֆրանսիայի «Ֆրանսիական լույս» կազմակերպության նախագահ Լևոն Խաչատրյանը ստորագրել են համագործակցության հուշագիր:

Հուշագրի նպատակն է կողմերի միջև ձևավորել և զարգացնել համագործակցություն՝ փոխադարձ աջակցության, սոցիալական համերաշխության, մարդու իրավունքների պաշտպանության և իրավական օգնության մատչելիության ապահովման ուղղություններով։ Համագործակցության շրջանակում նախատեսվում է համատեղ կազմակերպել մի շարք միջոցառումներ, այդ թվում՝ առողջապահական և իրավական իրազեկման նախաձեռնություններ, հանրային քննարկումներ և սեմինարներ, շահառուների համար բժշկական ու իրավաբանական խորհրդատվական օրեր, մարդու իրավունքների և սոցիալական պաշտպանության վերաբերյալ կրթական ծրագրեր, ինչպես նաև մասնագիտական փորձի և տեղեկատվության փոխանակման միջոցառումներ։

«Ֆրանսիական լույս» կազմակերպությունը բազմաթիվ միջոցառումներ է կազմակերպել Հայաստանում, այդ թվում՝ Արցախյան պատերազմում վնասվածքներ ստացած մարտիկների վիրահատությունների, վերականգնողական գործողությունների, ինչպես նաև մարզերում սոցիալական խնդիրներ ունեցող հայրենակիցներին առողջապահական հարցերով օժանդակություն կազմակերպելու եղանակով: