Այսօր՝ 2026 թվականի հոկտեմբերի 21-ին, Ֆրանսիայի Ալբի քաղաքում համագործակցության հուշագիր է կնքվել ՀՀ փաստաբանների պալատի և Ֆրանսիայի Փաստաբանական միությունների ազգային խորհրդի միջև:

Համագործակցության հուշագիրը ստորագրել են ՀՀ փաստաբանների պալատի նախագահ Սիմոն Բաբայանը և Ֆրանսիայի Փաստաբանական միությունների ազգային խորհրդի նախագահ Ժյուլի Կուտյուրիեն:

Այս օրերին ՀՀ փաստաբանների պալատի և ՀՀ փաստաբանական ակադեմիայի ներկայացուցիչները մասնակցում են Ֆրանսիայի միությունների ազգային խորհրդի կողմից կազմակերպած միջոցառումներին, այդ թվում՝ քննարկումներին, սեմինարներին:

Հատկանշական է այն, որ ՀՀ փաստաբանների պալատի և Ֆրանսիայի գործընկերների միջև ձևավորված է երկարամյա գործընկերային ջերմ հարաբերություններ և այս համագործակցության հուշագրի ստորագրումը հերթական կարևոր քայլն է երկու երկրների փաստաբանական համայնքների միջև մասնագիտական կապերի ամրապնդման, փորձի փոխանակման և փոխշահավետ համագործակցության զարգացման ուղղությամբ։
Հուշագրով նախատեսվում է ընդլայնել համագործակցությունը փաստաբանական գործունեության կազմակերպման, մասնագիտական կարգավորումների, փաստաբանական էթիկայի, միջազգային իրավունքի, իրավունքի գերակայության պաշտպանության և փաստաբանների մասնագիտական իրավունքների պաշտպանության ոլորտներում։

Համագործակցության առանցքային ուղղություններից է նաև փաստաբանների մասնագիտական կարողությունների զարգացումը։Մասնավորապես, նախատեսվում է կազմակերպել համատեղ սեմինարներ, վերապատրաստման դասընթացներ և աշխատաժողովներ, իրականացնել մասնագիտական տեղեկատվության ու փորձի փոխանակում:

Հուշագիրը կառույցներին հնարավորություն է ընձեռում համատեղ քննարկելու փաստաբանական համայնքների առջև ծառացած մարտահրավերները, փոխանակելու դրանց հաղթահարման արդյունավետ փորձը և զարգացնելու մասնագիտական համագործակցության նոր ձևաչափեր։