Շուրջ մեկ ամիս է, ինչ Փաստաբանների պալատում առաջ քաշվեց մի ծրագիր, ըստ որի յուրաքանչյուր հինգշաբթի ՀՀ բոլոր քաղաքացիները՝ անկախ սոցիալական դիրքից,  կարող են ստանալ անվճար իրավաբանական խորհրդատվություն:

Հանրային պաշտպանի գրասենյակի ղեկավար Մելանյա Առուստամյանը մանրամասնել է նախագծի գործունեությունը:

ՙՆկատի ունենալով, որ Հանրային պաշտպանի գրասենյակը իրականացնում է անվճար խորհրդատվություն ՀՀ օրենքով նախատեսված դեպքերում՝ քրեական վարույթներ իրականացնող նախադրույթ իրականացնոող, կասկածյալին, մեղադրյալին, ամբաստանյալին ազատել  իրավաբանական օգնության վճարից և տրամադրել անվճար հանրային պաշտպան և նկատի ունենալով այն հանգամանքը, որ կան որոշ կատեգորիաներ, որոնք 13 են և կարող են ստանալ անվճար խորհրդատվություն՝ նախատեսված փաստաբանության մասին օրենքով,  շրջանակը սրանով ավարտվում է: Այս իսկ պատճառով մենք որոշեցինք անվճար իրավաբանական խորհրդատվություն տալ այն խավերին, որոնց օրենքով չի հասնում: Փաստաբանական դպրոցի հիմնադրամի հետ համատեղ որոշվեց, որ ամեն  հինգշաբթի ժամը 10:00-17:00 իրականացնել անվճար խորհրդատվություն բոլորի համար՚:

Խորհրդատվությունը տրվում է թե՜ քաղաքացիական, թե՜ քրեական և թե՜ վարչական գործերով: Այն կարող է լինել ոչ միայն բանավոր, այլ նաև առանձին դեպքերում գրավոր խորհրդատվություն՝ կազմել դիմումներ, բողոքներ, հայցադիմումներ:

ՙՍրանով բեռնաթափվում է նաև մնացած օրերին կատարվող հանրային պաշտպանի գործը և գործնթացն արագացվում է բոլորի համար՚,-նշել է Մելանյա Առուստամյանը:

Եթե գործը մտնում է դատարան այդ ժամանակ ևս նշանակվում է ներկայացուցիչ և գործը մինչև վերջ շարունակվում է:

Ըստ վիճակագրության անցյալ տարվա առաջին եռամսյակում քաղաքացիական և վարչական գործերով դիմումներ եղել են մոտ 75-ը, 2015 թ.-ին արդեն՝ 290: ՙՎերջին 3 հինգշաբթի օրվա ընթացքում սպասարկվել են մոտ 100 այցելու՚,-տեղեկացրել է ՀՊԳ ղեկավարը:

Ծրագրի համար ժամկետներ չնշվեցին: ՙԱյս ծրագիրը կշարունակվի այնքան ժամանակ, ինչքան որ խորհրդատվության պահանջը լինի, քանի որ տեսնում են, որ քաղաքացիներն ունեն դրա կարիքը՚,-եզրափակել է Առուստամյանը: